03 de maio de 2023

Ata o 31 de maio podes inscribir a túa idea no Concurso de Proxectos Empresariais Semente Ribeira Sacra con 20.000€ en premios para impulsar o teu proxecto

O Concurso de Proxectos Empresariais Semente Ribeira Sacra busca proxectos innovadores para desenvolver o medio rural e poñer en valor os seus recursos. Mantense a idea coa que se creou a asociación Semente Monforte, facendo reverter na cidadanía o premio da Lotaría do Neno do ano 2014. Chegados á IX edición, o Concurso segue consolidándose con novas colaboracións e maiores incentivos económicos para os emprendedores.

Para incentivar a participación, o Concurso presentouse a pasada semana no IES Río Cabe de Monforte. Este mércores, 3 de maio ás 9.15h. preséntase na Universidade de Santiago e o día 9 ás 19.00 h. na Universidade da Coruña. Co mesmo propósito Semente Ribeira Sacra está promocionando nas redes sociais aos gañadores de anteriores edicións anteriores con entrevistas sobre o seu proxecto e a experiencia no Concurso.

Nesta IX edición do Concurso de Proxectos Empresariais Semente Ribeira Sacra repartiranse 20.000€ en premios:

1º Premio - 10.000 €
2º Premio -   6.000 €
3º Premio -   4.000 €

Ata o 31 de maio está aberto o prazo de presentación de ideas, a través da web sementeribeirasacra.org. A inscrición é de balde. O 20 de xullo publicarase o nome das dez ideas que o xurado considere de maior interese conforme aos obxectivos do concurso.

A estrutura da presentación da idea debe contar con:

• Título do proxecto (20 palabras para resumir de que trata a iniciativa)
• Descrición xeral (300 palabras para describir do modo máis eficaz en que consiste a iniciativa)
• Oportunidade do proxecto (150 palabras para responder á pregunta “¿por que debería investir no proxecto?” Neste apartado é necesario ter clara cal é a necesidade que cobre o produto ou servizo.
• Puntos fortes do proxecto (150 palabras que conteñan a información DAFO)
• Descrición temporal da formulación e implantación do proxecto (150 palabras para explicar as fases, prazos e outros compoñentes de tipo temporal para a formulación e implantación do proxecto)

As ideas seleccionadas presentarán antes do 30 de setembro do 2023, o proxecto rematado, achegando arquivos PDF mediante formulario na intranet de concursantes da web www.sementeribeirasacra.org.

Unha vez presentada a documentación, o xurado convocará aos finalistas para a exposición e defensa do seu proxecto. O fallo do xurado darase a coñecer o día 28 de outubro do 2.023, nesa xornada presentaranse os proxectos e pola noite celebrarase a entrega de premios.