02 de marzo de 2026

Comeza o Bono de Asesoramento para os proxectos finalistas do Concurso de Proxectos Empresariais Semente Ribeira Sacra

Este mércores, 4 de marzo, ás 16:00h, preséntase na aula de reunións do IES Río Cabe (Monforte de Lemos), o Bono de Asesoramento co que o Concurso de Proxectos Empresariais Semente Ribeira Sacra, amplía os premios que se entregan aos proxectos finalistas.

Na edición número XI do pasado ano, aos premios económicos que reciben os tres proxectos gañadores (1º Premio de 10.000€ para O FOGAR DOS SOÑOS / 2º Premio de 6.000€ para ENSÁCRATE  / 3º Premio de 4.000€ para VIÑALERT), engadiuse para os 10 finalistas a posibilidade de acceder a un programa de asesoramento estratéxico que conta coa financiación de AGADER.

Con este bono de asesoramento o Concurso e Proxectos Empresariais Semente Ribeira Sacra dá un paso máis para fortalecer a viabilidade e sustentabilidade dos proxectos finalistas a través dun acompañamento especializado en distintas áreas:

• Mentoría personalizada: Para guiar aos emprendedores nos seus desafíos estratéxicos e operativos.
• Asesoramento en modelos de negocio sostibles: Para estruturar proxectos con bases sólidas e escalables.
• Xestión financeira e acceso a financiamento: Para mellorar a administración de recursos e explorar oportunidades de investimento.
• Taller grupal de networking e creatividade: Para fomentar a colaboración e xerar sinerxias entre os emprendedores.

O bono de asesoramento deséñase baixo un enfoque práctico e personalizado, asegurando que cada emprendedor reciba apoio en función do seu nivel de desenvolvemento e sector de actividade. A combinación de sesións individuais e grupais garante un equilibrio entre a formación técnica e a creación de redes de apoio, fundamentais para a consolidación de negocios en contornas rurais.

Para a presentación da actividade que se desenvolverá durante os próximos meses combinando encontros presenciais e online, intervirán a directoral xeral de Agader, Mª Paz Rodríguez Rivera; un dos técnicos que imparte a formación por parte de EOSA, Javier Germade e en representación da Asociación Semente de Monforte que promove o Concurso de Proxectos Empresarais e esta formación, a presidenta, Pilar López.